Йошкар-Оласе виктарыше компаний- влаклан кудывечылаште реагентым кучылташ темлат

              Йошкар-Оласе виктарыше компаний- влаклан кудывечылаште реагентым  кучылташ темлат. Олаште кылмыше ий дене кучедалаш корно пашазе- влак тӱҥ шотышто ошма да шинчал вартышым шават, южо участкыште гына реагент дене пайдаланат. Ошма да шинчал вартышын 92 процентше ошма, 8 процентше шинчал гыч шога. Тудо ийым шулыкташ полша да машина орава ден йолчиемлан мунчалташ ок пу. А реагент вес семын пашам ышта. Тудо лум ден ийым шулыкта. Вӱд погына, тудым канализацийыш йоктарен колтыман. Сандене уремлаште тудым кучылташ шотлан ок тол. 19 процент корнышто гына йӱрвӱд канализаций уло. Вӱд йоген ок кай гын, уэш тудо кылма. Но шуко пачеран пӧрт кудывечылаште реагент тунар шуко ок кучылталт. Сандене ошмадыме реагентым виктарыше компаний- влак кучылт кертыт. Тыге подъездыш, пачерлашке ошма ок пуро,- каласен мэрын икымше алмаштышыже Лев Покровский. Икмыняр виктарыше компаний тиде йӧн дене подъездла воктене пайдаланаш тӱҥалын, - ешарен тудо.
         Фото: Йошкар-Ола мэрий.