Тазалыкаралтышын первичный звеножым уэмдыме паша умбакыже шуйна
Марий Элыште тазалыкаралтышын первичный звеножым уэмдыме паша умбакыже шуйна. Май тӱҥалтышлан республикыште тиде пашалан кучылташ палемдыме 374 миллион теҥге гыч 100 миллионжым кучылтмо. Программе ныл тӱҥ корно дене шыҥдаралтеш: объект- влакым чоҥымаш да капитально олмыктымаш, медицина оборудований да автотранспорт дене пойдарымаш. Тений программе кышкарыште Краснооктябрьский посёлкышто у врач амбулаторий чоҥалтшаш. Тушто пашам тӱналме. Чоҥаш, мебельым да оборудованийым ситараш 46 миллион теҥгем колташ палемдыме. Кодшо ийын тыгай объектым Волжский районысо Учимсолаште чоҥымо ыле. Тений вич объектым капитально олмыкташ палемдыме: кугыеҥлан кокыт да йоча- влаклан ик поликлиникым, Семёновкысо врач амбулаторийым. Пӱтынь паша 80 миллион теҥгелан аклалтеш. Вич объектым тений капитально олмыкташ 60 миллион теҥгем палемдыме. Тений 15 единице медицина оборудованийым налаш 226 миллион теҥгем палемдыме. Тушко 10 маммограф, 2 флюорограф, 3 рентген аппарат пурат. Тенийлан палемдыме 24 автомобиль гыч кумытшым кондымо. Кодшо ийын 61-тым кондымо ыле.
