Таче- СПИД дене кучедалме Тӱнямбал кече

            Таче СПИД дене кучедалме Тӱнямбал кечын республикысе тазалыкаралтыш министерствыште палемдат: Марий Эл шуко черланышан кундем радамыш ок пуро гынат, медицина тӧнеж- влак арня еда черланыше- влакым рашемдат. Кодшо 2022-шо ийым аклаш гын, 148 черланышым рашемдыме, тений лу тылзыште 177 еҥлан ты инфекций пижын. Тиде темылан Йошкар-Оласе медицина колледжыште эртыше Республике кӱкшытан 8-ше шанче-практик конференций пӧлеклалтын. Тушто колледжын студентше, 14-ше гимназийын тунемшыже- влак участвоватленыт. Нунын ончылно медицина колледжын туныктышыжо да студентше- влак ойленыт. Тазалыкаралтыш министерствын ончыктымыжо почеш, ВИЧ дене неле ситуаций Волжск олаште да Волжский районышто шотлалтеш. Кокымшо ден кумшо верыште У Торъял ден Советский район улыт. Тений лу тылзыште кодшо ийысе тыгаяк жап дене таҥастарымаште черым вараш пален налме еҥ- влакын чотышт ешаралтын. Тидыже калыкын тӱткышыжӧ шагалемме нерген ойла. Черланыше- влак коклаште шукыракше пӧръеҥ улыт. ВИЧ утларак ӱдырамаш-пӧръеҥ кыл гоч пижеш-76 процент, кокымшо верыште укол полшымо дене наркотик дене пайдаланыше- влак улыт.