Республикыштына вӱдым ситарыме 11 объектыште чоҥымо да пужен ыштыме паша кая

                Республикыштына вӱдым ситарыме 11 объектыште чоҥымо да пужен ыштыме паша кая. Нуно Звенигово, Морко, У Торъял, Юрино, Килемар районлаште верланеныт. Субъектлаште Калыкле да федерал проектлам  шыҥдарыме йодышым Российысе регионлам вияҥдыме шотышто Правительстве комиссийын заседанийыштыже каҥашеныт. Тушто Марий Элым вуйлатыше Юрий Зайцев лийын. Заседанийым Россий Правительстве вуйлатышын алмаштышыже Марат Хуснуллин этарен. Тудын мутшо почеш Президент Владимир Путин чоҥымо отрасльыште шумо кӱкшытлан кугу акым пуэн. Килемар районысо Визымяр посёлкышто да Арде селаште вӱдпучлам чоҥымо паша мучашыш лишемеш. Пашан акше 42 миллион теҥге. Кызытсыже дене 1970-шо ийла гычак пайдаланат. У объект- влак тӱжемат 750 еҥлан йӱшаш вӱдын качествыжым саемда. Моло муниципал образованийлаштат паша шукталтеш. У Торъял посёлкышто икымше номеран вӱдзаборышто вӱдым пушкыдемдыше станций 82 процентлан ямде. Морко районышто Чодыраял ден Арын селаште вӱдым ситарымаш проект мучашыш лишемеш. Тудо 93 процентлан ямде. Марий Элым вуйлатыше «Яндар вӱд» проект почеш пашам шуктымым шке терген шога.
             Фото: Марий Элым вуйлатышын  администрацийжын увер дене пашам ыштыше пӧлкаже.