Республикына коронавируслан кӧра пуртымо чарымашым кораҥдыме кумшо йыжыҥыш куснаш ямде

Республикына коронавируслан кӧра пуртымо чарымашым кораҥдыме кумшо йыжыҥыш куснаш ямде. Тидын шотышто потребительын праважым аралыме шотышто федерал надзор службын серышыж дене Республикым вуйлатыше Александр Евстифеев Оперативный штабын черетан заседанийыштыже палдарен. Чыла терген лекмеке, Роспотребнадзор ситуацийым кумшо йыжыҥлан келшышылан шотлен. Тиддеч посна Республикым вуйлатыше эше икмыняр кундарыше увер дене палдарен. Икымше пелийлан парым шотышто Российысе субъект- влакын рейтингыштышт Марий Эл 67-ше верым налын. 2017-ше ийыште сӱрет утларак неле ыле,- каласен Александр Евстифеев. Тыгак Марий Эл вузлаште бюджет вер- влакым ешарыме дене ончыл регион- влак коклаш пурен. Тиддеч посна компаний- влакым почмо да петырыме дене республика ик эн сай показательым очныктен. 2019-ше ийын лектышыже почеш миокардын инфарктше деч эмлыме верыште колымаш эн шагал. Республикына чодыра пожарым икымше суткаштак йӧртен кертше 30 ончыл регион- влак коклаште улеш. Тиддеч вара Роспотребнадзор виктемым вуйлатыше Светлана Булатова корновирус дене кылдалтше черын шагалеммыже нерген ойлен. Пытартыш лу кечыште черланыше- влакын чотышт иктат пеле гана иземын- 23 гыч 15 марте. Коронавирусан пневмоний 11 процентлан шагалемын. Койко фонд 50 процентлан яра шога. Тидын годымак кылме чер да грипп тургымлан ямдылалтмаш тӱҥалеш. Прививкылан вакцине- влак 31-ше август гыч толаш тӱҥалыт. Ведомствым вуйлатыше тыгак икмыняр чарымашым кораҥдыме шотышто  темлымашым ыштен. Мутлан, ужалкалыме рӱдер, монча, кинотеатр, парк, сквер- влак пашам тӱҥал кертыт. Но маске дене коштмо режимым арален кодыман да тӱшка мероприятий- влакым эртарыман огыл. Тыгак икмыше сентябрьлан тыршен ямдылалтман манын увертарыме.