Пушеҥгым ямдылыме радам ден норматив вашталтын
Марий Элыште шке кӱлешлыклан пушеҥгым ямдылыме радам ден норматив вашталтын. Тидын шотышто Марий Эл Кугыжаныш Погын декабрь мучашыште республикын законышкыжо вашталтышым пуртен. Тудо тений 10-шо январь гыч вийым налын. Закон почеш калыклан пушеҥгым ямдылыме тыгай нормативым ыштыме. 25 ийлан ик гана илыме пӧртым да озанлык оралтым чоҥаш 100 тичмаш кубометр пырням налаш лиеш. Илыме пӧрым пужен ышташ але олмыкташ да моло кӱлешлан лу ийыште ик гана 50 тичмаш кубометр пырням налаш лиеш. Закон тыгак пушеҥгым налме-ужалыме годым ойпидышым ышташ пуымо документ- влакын перечнььыштымат ешарен. Тидын деч посна кукшо пушеҥгым да йӱлымӧ верла гыч пырням налме шотыштат нормативым вашталтыме. Тымарте идалык еда 100 кубометрым ямдылаш лиеш ыле гын, кызыт 25 тичмаш кубометрым ямдылаш лиеш.
