Йошкар-Олаште Йоча клинический эмлыме верын инфекций корпусшым чоҥаш тӱҥалме

            Йошкар-Олаште Йоча клинический эмлыме верын инфекций корпусшым чоҥаш тӱҥалме. Тазалыкаралтыш министерствыште палемдыме почеш, йоча инфекций службын материально- техник базыже республикыште кужу жап проблеман лийын. Инфекций стационарын куатше- 88 койко. Тушечын лужо гына  боксан. А норматив почеш боксанже 50 процент деч шагал огыл лийшаш. Стационар 1963-шо ийыште чоҥымо зданийыште верлана. Тудын кумдыкшо санэпиднормо дене келшен ок тол. Сандене тыге пунчалме: йоча инфекцийым шуко профилян эмлыме вер негызеш вераҥдаш шотлан толеш. Молан манаш гын, южгунам йоча- влакын инфекцийыштым тӱрлӧ специальностян врачын консультацийышт деч посна диагностироватлаш неле,- рашемдат ведомствыште. Куд тӱжем квадрат метр кумдыкан у медицина тӧнежыште 70 боксым, сай оборудованиян тичмаш реанимацийым вераҥдаш шонат. Объектлан федерал финансирований 700 миллион утла теҥге лиеш.