Шернурышто у тротуарым ыштат да кызытсе жаплан келшыше тул волгыдым пуртат

              Шернурышто у тротуарым ыштат да кызытсе жаплан келшыше тул волгыдым пуртат. Шернур посёлкышто тений качестван лӱдыкшыдымӧ корно калыкле проект кышкарыште шуко пашам ышташ палемдыме. Йошкар-Ола- Уржум трассе воктене кум меҥгат 600 метр кужытышто у тул волгыдым пуртат. Светильник- влакын пашаштым тора гыч виктараш лӱмын ыштыме комплекс кучылталташ тӱҥалеш. Тидыже лампе- влакын пашаштым тергаш, пудыргымо вержым рашемдаш, шкевуя электролинийыш ушнымым рашемдаш, 30 процент наре электроэнергийым аныклаш полша. Тиддеч посна метрат пеле кумдыкан тротуарым кум меҥгат 900 метр кужытышто ыштат. Тиде пашалан 50 миллионат 100 тӱжем теҥге наре окса кайышаш. Пашам тений август мучаш марте пытарышаш улыт. Транспорт министерствын ончыктымыжо почеш тений чылаже 7 илемыште искусственный волгалтарымашым пуртат. Кумытшо шотышто контрактым пеҥгыдемдыме: Звенигово велысе Чакмарийыште, Параньга районысо Матародышто да Куженер районысо Йӱледӱрыштӧ.
           Фото: «Волго-Вятскуправтодор» ФКУ