Йошкар-Олаште у тукым книгагудо пашам ышташ тӱҥалын

                Йошкар-Олаште у тукым книгагудо пашам ышташ тӱҥалын. Рӱдӧ оласе централизованный книгагудо системын 25-ше номеран филиал- книгагудыжо Йошкар-Олаште моделян икымше книгагудо лийын. Тудын верланыме пӧлемжым 1980-шо ийыште чоҥымо. «Тӱвыра» калыкле проект почеш тудым капитально олмыктымо да у оборудованийым шындыме. Тиде пашалан 5 миллион теҥгем кучылтмо. Теҥгече уэмдыме тӧнежыште Марий Элым вуйлатыше Александр Евстифеев лийын. Централизованный книгагудо системым вуйлатыше Алевтина Тараканова вуйлатышылан каласкален: филиал модельный книгагудо- влакым ышташ оксам ойыраш элысе субъект- влакым ойырен налме конкурсышто сеҥышыш лектын. Тиде куанле татым 41 ий вученна да кум ий сеҥымаш деке ошкылынна. Теве ынде ме у книгагудышто улына. Тудым олмыктымо, у мебельым, оргтехникым налме, интерьерым вашталтыме, кок тӱжемат кумшӱдӧ утла у книгам налме. Александр Евстифеев лудшо- влак дене пашам ыштыме да лудмо зоно, краеведений, конференц-залым, арт-холлым, йоча- влак модмо верым ончен. Тудо у книгагудын у йӧнжым: ешартыш шинчымашым пуымо программе да лӱмын ыштыме профориентаций зоным ончен аклен. Тиде тунемше- влаклан моткоч кӱлешан. Тендан опытдам рӱдӧ олаштат, республике мучкат чолган шараш кӱлеш манын. Республикыште икымше тыгай книгагудым кодшо ийын У Торъялыште почмо ыле. Тений ойырен налме конкурсым эше ныл книгагудо эртен.