Йошкар-Олаште тенийлан палемдыме олмыктышаш корно- влакым ыштен шуктымо
Йошкар-Олаште тенийлан палемдыме олмыктышаш корно- влакым ыштен шуктымо, шушаш ийысе объект- влак дене паша шукталтеш. Таче 6 шагат эр гычак Марий Элым вуйлатыше Александр Евстифеев рӱдӧ ола мучко паша дене коштын савырнен да кызыт паша кайыше икмыняр объектыш миен. Эн ончыч тудо кӱртньӧ корно вокзал воктене Советский уремын ужашыжым ончен. Тиде ик тӱҥ урем. Тушто пашам 30-шо сентябрьлан мучашлышаш улыт ыле, но чыла сомылым ончылгоч шуктымо. Корно пайдаланаш ямде. Транспорт министр Александр Герасименко каласкален: олмыктымо корнын ужашыже кум меҥге утла. Тушто контракт почеш мо кӱлешым чыла ыштыме. 2021-ше ийлан палемдыме программым тичмаш мучашлыме. Ме кызыт Панфилов урем деке лишемынна. Тудым 2022-шо ийысе программе почеш шуктена. Вара Суворов ден Машиностроитель уремлаш куснена. Кокымшыжын кужытшо ныл меҥге утла. Акше- 160 миллион теҥге. Тыге, ме олаште гына 2022-шо ийысе план почеш 210 миллион теҥгеаш пашам шуктена.- каласен министр. Пашам сентябрьыште мучашлышаш улына. Республикым вуйлатыше шуктымо пашам кӱкшын аклен. Александр Евстифеев тыгак Санчурск корныш лекмаште Шоя эҥер гоч олмыктымо кӱварым ончен лектын. Чыла пашам тылзе деч шагал жапыште шуктымо. Тиде кӱварым вес ийын гына олмыктышаш улыт ыле. Но ешартыш оксам ойырымо дене пашам ончылгоч ышташ йӧн лектын. Вуйлатыше палемден: пашам писын шуктымаш республикылан ешартыш лимит оксам налаш йӧным пуа. Кызыт республике корным олмыктымо дене Россий мучко 13-шо верым айла.