Йошкар-Олаште грамотность рӱдер почылтеш

                Йошкар-Олаште грамотность рӱдерым почаш палемдыме. Вӱргечын, 10-шо ноябрьыште, Чавайн лӱмеш калыкле книгагудышто тудым торжественно почмаш лиеш. «Грамотностьын книгагудыжо» проектым 2020-шо ийыште шыҥдараш тӱҥалме. Тудым Президент грантын фондшо полшымо дене калыкын йылме культурыжлан полышым пуышо «Тотальный диктант» фонд илышыш шыҥдара. Грамотность рӱдер- тиде кажне кумылан еҥлан оксам тӱлыде, сай качестве дене шке грамотностьшым нӧлталын кертме, руш йылмын ойыртемже да историйже нерген уым пален налме, лингвистике дене эн сай книга- влакым лудаш лийме площадке. Тыгай рӱдер- влак Москошто да 12 регионышто пашам ыштат. Тушто руш йылме нерген справочный, тунемме, шанче, йоча литературым кӱлеш наре  чумырымо. Йошкар-Олаште проектым торжественно почмаште «Тотальный диктант» фондын директоржо, Россий президент пеленысе руш йылме дене Советын еҥже Ольга Ребковец, «Тотальный диктантын» филологий советшым вуйлатыше, «Грамота.ру» порталын тӱҥ редакторжо, Виноградов лӱмеш руш йылме институтын шанче пашаеҥже Владимир Пахомов лийыт. Лӱмлӧ филолог –шанчыеҥ руш йылме нерген лекцийым лудеш. Тӱвыра министерствын увертарымыж почеш, лишыл жапыште грамотность рӱдер- влак Козьмодемьянскысе, Звениговысо, Волжскысо да У Торъялысе книгагудылаште почылтшаш улыт. Тушко республикысе да моло кундемласе 11 гыч 18 ияш марте тунемше- влак ушнат.