Йошкар-Олаште «Фермерын школжо» почылтын
Йошкар-Олаште «Фермерын школжо» почылтын. Тудо тӱҥалше предприниматель- влаклан полышым пуышаш. Школым Марий университет, ял озанлык министерстве да Россельхозбанк ямдыленыт. Тыгай тунемме портал 25 регионышто пашам тӱҥалын. Нунын кокла гыч 9-ыже икымше гана почылтын. Тушко Марий Элат пура. Тунеммаш кум тылзе шуйна. Тунемме жапыште погынышо- влак шке ял озанлык пашам почаш кӱлешан чыла шинчымашым налыт, агропредприятийлаште практикым эртат, ял озанлык специальность- влак дене теорий шинчымашым налыт да бизнес планым ямдылат. Кызыт 25 еҥ шинчымашым пога. Марий университетын «Точка кипений» площадкыштыже школым почмаште ректор Михаил Швецов, ял озанлык министрын алмаштышыже Людмила Смирнова, «Россельхозбанкын» марий филиалжын директоржо Георгий Сергеев лийыныт.
