Уста артист дене чеверласена
Редакцийышкына таче ойган увер пурыш. Ӱмыржӧ мучко М.Шкетан лӱмеш Марий национальный драме театрыште тыршыше, Марий Элын калык артисткыже Ольга Харитонован ӱмыржӧ лугыч кӱрылтын. Тудо шушаш ий 11 январьыште 75 ийым шукта ыле. Пытартыш жапыште черле лийын. Ольга Харитонова Куженер районысо Рушплак ялыште шочын. И.Палантай лӱмеш музыкальный училищын дирижерско-хоровой отделенийжым пытарыме деч вара 1969 ийыште М. Шкетан лӱмеш Марий кугыжаныш театрын труппышкыжо ушнен да 2015 ий марте сценыште модын. Ольга Харитонова тӱрлӧ шӧрынан рольым чоҥен. Классический произведенийла почеш шындыме спектакльыште шукыж годым комедий сынаным сайын келыштарен. Но эн сайын почылтын тиде актрисе марий драматургий почеш шындыме постановкылаште. Марий илышым, марий ӱдырамашын чонжым сайын пален, умылен, сандене темлыме образыш пурашат куштылгырак лийын. Тыште адакат муралтен колтымыж дене кумылым савырен.