У чапле перинатал рӱдерыште икымше аза шочын

            Йошкар-Олаште у чапле перинатал рӱдерыште икымше аза шочын. Кокымшо июньышто кечывалым Анастасия лӱман ава кум килоат пеле нелытан эргым ыштен. Пытартыш жап марте Юл кундем округышто лач Марий Элын гына кызытсе жаплан келшен толшо, у оборудований дене пойдарыме перинатал рӱдерже уке ыле. Республикыште акушерстве да гинекологий дене полышым пуымо  кок кӱкшытан системе вияҥын. Кокымшо кӱкшытан тӧнежыште таза, кугу полышым йоддымо ӱдырамаш- влак азам ыштат. А шукыракше кумшо кӱкшытан Йошкар-Оласе тӧнежыште шочыктат. Тушто кеч-могай полышымат пуэн кертыт. Азам ыштыме ончычсо пӧртым 60-шо-80-шо ийлаште чоҥымо. 21-ше курымышто тудо кызытсе йодмаш дене келшен ок тол. Сандене 2020-шо ийыште федерал бюджет оксам ойырен, перинатал рӱдерым чоҥаш тӱҥалме. 2022-шо ийыште тудым ыштен шуктымо. Тиде кечылаште тудо пашам ышташ тӱҥалын.