Тений вӱдыштӧ икымше туткар лийын
Теҥгече республикыште тений вӱдыштӧ лийше икымше происшествийым регистрироватлыме. МЧС пресс-службын увертарымыж почеш, Юл эҥерыште Килемар районысо Дубовский посёлко воктене кум еҥ снегоход дене ий гыч вӱдыш пурен каен. Йырым- йыр вӱд мушмо вер шуко улмылан кӧра, шке лектын кертын огытыл. Нуным утараш Козьмодемьянскысе аварийно утарыше служба миен. Аэробот полшымо дене серыш луктыныт. Медицина полыш кӱлеш лийын огыл. МЧС пашаеҥ- влак Йошкар-Олаште Изи Какшаныште ийын кӱжгытшым висеныт. Тӱҥ кӱвар воктене тудо 50 сантиметр кӱжгытан, Театр кӱвар воктене 48 сантиметр, Ширяйково микрораойнышто понтон кӱвар воктене 52 сантиметр. Утарыше ведомство ушештвара: ий ӱмбаке лекташ лӱдыкшо, а чарыше пале- влакым пижыктыман верлаште ий ӱмбаке лекмылан тӱжемат пеле гыч кок тӱжем теҥге марте штрафым тӱлыктен кертыт.