Шуко шочшан еш- влаклан пожар лӱдыкшыдымылык нерген ушештареныт

               Курык марий районысо шуко шочшан еш- влаклан пожар лӱдыкшыдымылык нерген ушештареныт. Теле - тул лӱдыкшым поснак эскерыме жап. Шолдыргышо коҥга, йоҥылыш келыштарыме электроприбор, шырпе дене модшо йоча- влак- чылажат тул пижме лӱдыкшым луктыт. Республикысе пожар надзорын пашаеҥже- влак тул пижмым шижтарыме шотышто кугу профилактике пашам шуктат. Тидын годым шкет илыше шоҥгыеҥ, шуко шочшан еш, шоналтыде илыше еҥ- влаклан тӱткышым утларак ойырат. Кылме тылзын Курык марий район мучко специалист- влак риск группыш пурышо 76 ешыш миеныт. Пожар лӱдыкшыдымылык правилым эскерыме, тулым йӧртымӧ правил да йӧн, тул пижме годым мом ыштышашым, пожарный- влакын телефоныштым ушештареныт, шарныктарыше кагаз- влакым кучыктеныт. Тидымат ешареныт: илен лекташ ситыше окса кугыт деч шагалрак парышым налше еш- влаклан электрооборудованийым, коҥгам, тӱньыкым олмыктымлан да тул пижме нерген шижтарыше оборудованийым налмылан кучылтмо окса пӧртылталтеш.
                Фото:Марийская правда.