Шӱк-куштырам ойыркалыше ныл комплексым чоҥат

                   Республикыштына шӱк-куштырам ойыркалыше ныл комплексым чоҥат. Марий Элым вуйлатыше Александр Евстифеев «Экологий» калыкле проектым шыҥдарыме йодышлан пӧлеклалтше совещанийым эртарен. Пӱртӱс поянлык министр Алексей Киселёв «Пеҥгыде шӱк-куштыра дене пашам ыштме комплексан системе» регионысо проектым шыҥдарыме нерген каласкален. 2024-ше ий мучаш марте Йошкар-Олаште, Шернур, Курык марий да Волжский районлаште ныл комплексым чоҥымо лиеш. Нунын  тӱшка куатышт талукышто 205 тӱжем тоннын погына. Ончыкылык инвестор- влак дене соглашенийым пеҥгыдемдыме, планым ыштыме. Мутлан, Курык марий район Вопшынангыр ял воктене полигонышто ойыркалыше комплексым тенияк пашаш колташ палемдыме. Тиде модулян конструкций лийшаш. Проект почеш талукышто 15 тӱжем тонн куштырам ойыркален кертеш, но тушто вич тӱжем тонн деч утыжо нигунам лийын огыл. Комплексым августышто кондышаш улыт. Ойыркалыме яндам, пластикым, кӱртньым переработкыш кушко колтымо шотыштат йодыш каҥашалтеш. Совещанийыште тыгак «Ойыртемалтше вӱд объект- влакым арален кодымаш» регионысо проект каҥашалтын. Тудын кышкарыште Оршанке районышто Изи Кугунур ял воктене Ошла эҥерыште вӱд аралтышын пундашыжым эрыктыме паша шукталтшаш. Алексей Киселёв тыгак «Чодырам арален кодымаш» регионысо проектым шыҥдарыме нергенат ойлен. Тидлан тений федерал бюджет гыч 42 миллион теҥге ойыралтеш. Тушечын 34 миллионжо чодыра пожарым йӧртымӧ техникым налаш, ныл миллионжо чодыра озанлык техникым налаш, кум миллион утлаже чодырам шындыме кумдыкым ешараш. Таче кечылан 99 процент контрактым ыштыме.