Сенатор Сергей Мартынов Марий Турек районыш миен коштын

Сенатор Сергей Мартынов паша визит дене Марий Турек районышко миен коштын. Район администраций вуйлатыше Сергей Решетов дене корным чоҥымо, школ-влакым капитально олмыктымо, олтымо тургымым эртарен колтымо шотышто йодыш-влакым каҥашеныт. Марий Турек районышто «Ялысе кумдыкым вияҥдымаш» программе почеш кужун вучымо «Дружино- Малые Нослы – Исмаил» корным чоҥеныт. Но тыштат эше йодыш уло. Корнын ужашыже федерал мланде гоч эрта, сандене ынде тудым муниципал собственностьыш кусараш логалеш. Олтымо тругым икшырымын эртен. Район 80 процентлан газифицироватлалтше. Марий Турек ял озанлык районлан шотлалтеш. Сандене кызыт уло вий шошо агам эртарен колтымашке виктаралтын. Преприятий-влак жапыштыже техникым ачаленыт, шапаш ужаш ден ГСМ-ым налыныт. Тунемме тӧнеж-влак нерген ойлаш гын, тыште икмыняр нелылык уло. Ятыр школ пеш тошто. Сандене нацпроект-влаклан эҥертыде огеш лий. Тудын полшымыж дене 45 миллион теҥгелан Карлыган школым тӧрлымӧ. Сардаялыште йӧршеш у школым чоҥен шогалтыме. Сергей Мартынов школ-влакым уэмдыме шотышто пашам умбакыжат шуяш темлен. Ончыкыжым йочасад-влакымат ачалаш кӱлеш. Муниципалитет тидым шке кӱшеш гына ыштен огеш керт. Сандене полышлан ӱшанаш кодеш.