Руэм школышто Росгвардийын профилян кадет классшым почыт

                 Медведево районысо Руэм школышто Росгвардийын профилян кадет классшым почыт. Тунемше- влакым патриотизм шӱлышеш шуарыме шотышто пырля пашам ышташ Росгвардийын верысе виктемжым вуйлатыше, полицийын полковникше Геннадий Файзуллин ден туныктымо тӧнежын директоржо Юлия Харужина соглашенийым пеҥгыдемденыт. Ынде сотрудник да военнослужащий- влак шке кид йымакышт республикысе вич кадет классым да 150 наре тунемшым налыныт. Самырык росгвардеец- влак школысо тӱҥ предмет- влак деч посна строевой, физический ямдылалтмашым эртат, икмыняр военный предметым тунемыт. Тиддеч посна нунын дене патриотизм шӱлышеш шуарыме шотышто занятий-влакым эртарат. Вуйлатыше- влак тыгак ончыкылык мероприятий-влакымат каҥашеныт. Нунын коклаште Росгвардийын подразделенийлашкыже миен, ветеран- влак дене вашлиймаш, патриот акций, ведомствын историйже дене палыме лиймаш да шуко молат улыт.
                 Фото: МариМедиа.