Российын кечынже Йошкар-Олаште ятыр мероприятий лиеш

                    Российын кечынже Йошкар-Олаште ятыр мероприятий - онлайн-концерт, ончер, квест- влак эртат. Эпидемиологий ситуацийын неле улмыжлан кӧра Российын кечыжым кумдан пайремлымаш ок лий, но пайрем шӱлышым садак ыштат, шукыжо онлайн-режим дене лиеш. Мутлан, 12-шо июньышто Сеҥымашын 30-шо идалыкше лӱмеш тӱвыра полатыште «Мемнан пӧртна- Россий» пайрем концерт лиеш. Тудым интернетыште ончыктат. А икымше пачашыште «Мемнан Элна- Россий» фотоончер пашам ышташ тӱҥалеш. Организационно-тӱвыра рӱдерыште кид-паша мастарлыкым ончыктышо виртуал ончер почылтын. Йошкар-Олан историй тоштерыштыже эре ыштыше экспозиций- влак ончылгоч возалтме почеш калыкым вучат. Рӱдӧ каныме парк кугу программым ямдылен. Тыгак калыкым Россий кӱкшытан  «Российын Флагше- влак» да «Российын окнаже- влак» пайрем акцийлашке ушнаш ӱжыт.