Республикыштына теҥгечысе кече гыч тул пижме ваштареш шогымо посна режимым пуртымо

                       Республикыштына теҥгечысе кече гыч тул пижме ваштареш шогымо посна режимым пуртымо. Юалге игече шога гынат, тул ваштареш шогымо тургым тӱҥалын. Тул пижмын утларак амалже айдеме дене кылдалтын. Тиде – тул дене шекланыде пайдаланымаш, шӱкшакым да кукшо шудым йӱлалтымаш. Тидын шотышто кызыт могайрак сӱрет улмо нерген Марий Элым вуйлатыше Александр Евстифеевын правительствын заседанийжым эртарымыж годым ойлымо. Докладым Правительство председательын алмаштышыже Степан Воронцов ыштен. Тудо палемден: пожар лӱдыкшӧ тургым тӱҥалме деч ныл кече ончыч гына- 15-ше апрель гыч 106 гана тул пижын. Тушечын 81-тыже кукшо шудым йӱлатымылан кӧра. Кодшо арнян 76 пожарым палемдыме, тушеч 59-ыже кукшо шудо дене кылдалтын. Статистике почеш эн шуко тул пижмашым Йошкар-Олаште, Волжскышто. Курык марий, Звенигово да Медведево районлаште палемдыме. Республикыштына чодыраште, илыме верлаште кугу лӱдыкшӧ улмылан кӧра теҥгечысе кече гыч посна режимым увертарыме,- каласен Александр Евстифеев. Тидымат ешарен: муниципалитет- вуйлатыше- влак калык дене умылтарыме пашам гына эртарышаш огыл, нарушитель- влакым мут кучашат шогалтышаш улыт. Тиддеч посна 
вӱдшор жапыште калыклан лӱдыкшыдымылыкым ыштыме нергенат ойлымо. Кызытеш лӱдыкшӧ уке. Тарватыме эше ик йодыш Кугу Сеҥымашлан 76 ий теммылан торжественный мероприятийым ямдылыме да эртарен колтымо дене кылдалтын. Кызыт парадын репетицийже- влак эртат. Чыла участникшат вакцинацийым эртен. Кадет класслаште тунемше- влакын температурыштым висат. 9-ше майыште эрдене эрак рӱдӧ площадьын корныштыжо да ончышо- влакын шогымо верлаште санитар обработкым ыштат. Ончышо- влак маске дене металлодетектор гоч пурталтыт. Олан мэржылан рӱдӧ олаште порядкым умбакыже ышташ, пӧрт пырдыж- влакым сылнетараш кӱштымӧ.