Республикыштына коронавирус деч вакцинаций утыр вийым налеш
Республикыштына коронавирус деч вакцинаций утыр вийым налеш. 28-ше июньлан шотлымаште, чылаже 88 тӱжем утла комплект вакциным кондымо. Икымше компонетше дене 74 тӱжемат 700 утла еҥ прививкым ышыктен, кокымшыж дене 58 тӱжемат 700 утла еҥ. Тидын нерген Марий Элым вуйлатыше Александр Евстифеев Россий Правительстве председательын алмаштышыже Татьяна Голикован элыштына вакцинаций йодыш дене эртарыме селектор совещанийыште ойлен. Вице-премьер палемден: пытартыш жапыште икымше компонент дене вакциным ыштыше- влакын чотышт ешаралтын гынат, республикыште вакцинаций темпым кугемдаш кӱлеш. Кызыт Марий Элыште вакцинацийым 19 медицина организацийысе 110 пунктышто да 64 мобильный пунктышто ыштыкташ лиеш. Александр Евстифеев палемден: республикыште черланыше- влакын ешаралтмышт коеш. Сандене эмлалташат утларак пыштат. Тыге кок арняште койко фондымат ешарыме: 370 гыч тӱжемат 405 койко марте. Тушто кызыт тӱжемат 180 пациент эмлалтеш. Чер дене кучедалаш тений республикын бюджетше гыч 92 миллион утла теҥгем ойырымо. 5-ше июль марте утларак ямде улмо режимым пеҥгыдемдыме.