Республикылан шӱк-куштырам посна погаш контейнерым налаш оксам ойырат
Республикылан шӱк-куштырам посна погаш контейнерым налаш оксам ойырат. Федерал субсидий тенияк толшаш. Тидын нерген Российын пӱртӱс поянлык министерствыже увертара. Республикын йодмашыжым лӱмын ыштыме комиссий сайлан шотлен. Чылаже тений тыгай йодмашым 53 регион пуэн. Тушечын 46 кундемжым ойырен налме. Йодмашын тичмаш кугытшо- 65 тӱжем контейнер. Российын пӱртӱс поянлык министрже Александр Козлов тыге каласен: тиде пашам ме вес ийынат шукташ тӱҥалына. 2024-ше ийлан 50 процент коммунал шӱк-куштырам обработкыш колташ палемдыме. Сандене кызыт регионлаште келшыше инфраструктура ышталтеш. Регион- влакым ойырен налме годым комиссий икмыняр пеҥгыде йодмашым шотыш налын. Регионышто отход дене пашам ыштыме шотышто территориальный схема лийшаш, шӱкшакым погымо радам пеҥгыдемдалтшаш, тушко посна погымо шотышто положеният пура. Тыгак регионышто пеҥгыде куштырам обрабатыватлыше объект лийшаш. Тудо шупшыктышаш, ойыркалышаш да переработкым ыштышаш. Тыгай йодмашлан 46 кундем гына келшен толын. Нуын коклаште Марий Элат уло. 65 тӱжем контейнерым налаш ик миллиард теҥге ойыралтеш.