Ползунов ден Суворов урем ушнымаште оҥган развязкым ышташ палемдыме

                  Йошкар-Олаште Ползунов ден Суворов урем ушнымаште оҥган развязкым ышташ палемдыме. Тудым олан генеральный планыштыже ончыктымо. Тиде неле да шергакан проект корнын тиде ужашыштыже лектын шогышо ятыр йодышым кораҥдаш полшышаш, но кӱшыл бюджетын полшымыжо дене гына илышыш шындараш лиеш. Олан администрацийже Ползунов урем дене кайыше корно ужашым чынжымак кӱлешанлан шотла. Тудо Йыван Кырла ден Йошкар Армий уремлам ушен шога да транспортлан шукырак кошташ йӧным пуа. Но изин –изин тӧрлымӧ дене йодыш ок кораҥдалт, генпланыште палемдыме семынак, оҥган развязкым ыштыман. Проектирований куштылго ок лий: йӱрвӱд йогымо канализацийым чоҥымым шотыш налман, икмыняр объектым кораҥдыман, Свердлов урем дене ушнымашым шотыш налаш кӱлеш. Сандене олан бюджетше гына тидым ыштен ок керт. Кӱшыл бюджет деч полыш кӱлеш,- умылтарат ола администрацийыште.