Марий Элыште эртыше ийын 372 тӱжем квадрат метр илыме верым пашаш колтымо
Марий Элыште эртыше ийын 372 тӱжем квадрат метр илыме верым пашаш колтымо, але 100 утла процентым. 2021-ше ийыште «Илыме вер да оласе кумдык» калыкле проектым шыҥдарыме пашам Россий Федерацийыште регионлам вияҥдыме шотышто Правительстве комиссий президиумын заседанийыштыже ончымо. Тудым видеоконференц кыл режим дене Правительстве вуйлатышын алмаштышыже Марат Хуснуллин эртарен. Погынымашыште Марий Элым вуйлатыше Александр Евстифеев лийын. Эртыше ийын лектышыже почеш республикыште 372 тӱжем наре квадрат метр илыме верым чоҥен пашаш колтымо. Тидыже кодшо ийысе тыгаяк жап дечат, талукаш план дечат шукырак. Кодшо ийын республикыштына 85 кумдыкым тӱзландарыме. Россий конкурсышто сеҥышыш лекше проект- влакымат илышыш шыҥдарыме. Йӱшаш вӱдым ситарыме шотышто шуко пашам шуктымо. Икмыняр объектыште паша теният шуйна. Илаш йӧрыдымӧ пӧртла гыч калыкым кусарыме йодыш денат палемдыме планым тӱрыс шуктымо.