Марий Элысе ечызе- влак шке теле тургымыштым Мурманск областьыште почыт
Марий Элысе ечызе- влак шке теле тургымыштым Мурманск областьыште почыт. Кировск олаште Россий кӱкшытан таҥасымашын стартышкыже республике гыч 6 ечызе лектеш. «Хибинскысе таҥасымаш» мемнан спортсмен- влакын тиде тургымышто ушнымо икымше таҥасымаш лиеш. Марий Элысе ече федерацийым вуйлатыше Дмитрий Сергеевын мутшо почеш, тушко республикын сборныйжо гыч Дмитрий Чекулаев, Александр Подыганов, Александр Шабалин, Тигран Арутюнян, Ирина Соловьева ден Юлия Падыганова каят. Кызыт нуно чыланат Кировскышто ямдылалтме сборышто улыт. Таҥасымаш 18-ше гыч 21-ше ноябрь марте эрта. Икымше кечын нуно классик йӧн дене вич да лу меҥгыш таҥасат, кокымшо кечын спринтер куржталмаште ӱчашат, кумшо кечын эрыкан йӧн дене тыгаяк кужытлашке лектыт. Вара нуно Коми республикыш каят. Тушто 27-ше 28-ше ноябрьыште «Сыктывкарысе ечыгорно» таҥасымаш лиеш. Марий ечызе- влак деке эше Златоустышто сборышто улшо Станислав Иванов ден Александр Ишмятов да Станислав Егоров ушнат. А республике кӧргыштӧ икымше стартым 12-шо декабрьлан Кортышто палемдыме. У ий марте Марий Эл кубкын кок йыжыҥже лийшаш: 19-ше декабрьыште Арын селаште, 30-шо декабрьыште Волжск олаште.