Марий Элым вуйлатыше Волжский районысо социал кӱлешан объект- влакым ончен лектын

                      Марий Элым вуйлатыше Волжский районысо социал кӱлешан объект- влакым ончен лектын. Эн ончыч Александр Евстифеев Шарача селаште вӱдым пуымо узелым ончен, кыдалаш школышто лийын. Тымарте  вӱдым 1984-ше ийыште ыштыме скважине гыч налыныт. Тудо шагатыште 6 кубометрат пеле вӱдым пуэн. Но 94 утла процентлан тоштемын. Волжский районлан ныл ялыште скважиным кӱнчаш 12 миллион теҥге утла оксам ойырымо. Теҥгече тушто пашам мучашлышаш улыт ыле. У вӱдзабор шагатыште 16 кубометр утла вӱдым пуа. А калык эн шукыжо 10 кубометрым налеш. Тыге республикыште вӱдым ситарыме йодыш виктаралтеш. Шарача селаште Республикым вуйлатыше кыдалаш школышкат миен. Тудым у тунемме ий тӱҥалтышлан капитально олмыктымо, 9 миллион утла теҥге оксам кучылтмо. Икымше сентябрь марте у мебель да оборудованийым шынден шуктышаш улыт. Директорын мутшо почеш, кодшо окнамат вашталтен пытараш кӱлеш ыле. Александр Евстифеев икымше ноябрь марте сметым шотлаш да кӱлеш йодмашым пуаш кӱштен. А вес ийын олмыктымо пашам умбакыже шуяш кӱлеш манын. А тений эше 103 окнам вашталтыман.