Марий Элым вуйлатыше волонтёр- влаклан тауштен

                   Марий Элым вуйлатыше пандемий дене кучедалмаште да калыкым возен налмаште тыршымыштлан волонтёр- влаклан тауштен. Тудо кодшо кечылаште добровольчестве толкынышто тыршыше- влак дене вашлийын. Нуным саламлышыла палемден: республикыштына добровольчестве у кӱкшытым 2019-ше ийын инвалид- влакын Россий кӱкшытан кумшо кеҥежымсе спартакиадыштым эртарыме годым налын. Тунам нуно кугу полышым пуэныт. Тиддеч посна нуно самырык тукымым шуарымаште, увер кампанийлам эртарымаште, чодыра тулым йӧртымаште чолган тыршат. А кодшо ийын да теният тендан медициныш, полыш ден кочкыш сатум конден кодымашке пыштыме надырда аклаш лийдыме. Шыжым калыкым шотлымаш тӱҥалын. Тыштат, кӱлешан кугыжаныш задачым шуктымаште,  волонтёр- влак деч посна ок лий. Правительстве вуйлатышын икымше алмаштышыже Михаил Васютинын мутшо почеш, волонтёр корпусын пашажым Самырык- влак полатын добровольчествылан полышым пуышо ресурс рӱдерже виктара. Волонтёр- влакым чумырымо кампаний годым 120 еҥ кӱлеш ыле гын, 238 еҥ возалтын. Кызыт кече еда республике мучко 30 утла волонтёр переписьым эртарымаште полша. Перепись графикым ончылтен шукталтеш. Волонтёр- влакын пашаштым тыгак тазалыкаралтыш министр Марина Панькова, Ресурс рӱдерым вуйлатыше Лариса Лоскутова, спорт-туризм министр Лидия Батюкова мокталтен ойленыт.

Прошлые выпуски