Марий Элым вуйлатыше коронавирус шотышто федерал оперативный штабын заседанийыштыже участвоватлен
Марий Элым вуйлатыше коронавирус шотышто федерал оперативный штабын заседанийыштыже участвоватлен. Россий правительство председательын алмаштышыже Татьяна Голикова оперативный штабын черетан заседанийжым эртарен. Тушто элна мучко коронавирус инфекцийын кузе шарлымыже, тазалыкаралтышыште могай сомыл лийын толмо йодыш- влакым ончымо. Тиддеч посна видеозаседанийын участникше- влак йотэл гыч тунемше студент- влакын Российышке толмо пашам кузе виктарыме нерген ойленыт. Марий Элыште йот эл гыч еҥ- влак кок вузышто тунемыт. План почеш нуно кок тӱжемат 679 еҥ лийшаш улыт. Ковидым регистрироватлыме жап гыч тачысе кечылан 47 студент толын, нуным ПЦР йӧн дене тергыме, 14 кече жапыште чыланат обсервацийыште лийыныт. Нунын изоляцийыште лийме жапыште толшо студент- влак коклаште черланышым рашемдыме огыл. Ушештарена: коронавирус дене черланыше- влакым эмлаш 7 медицина организацийыште 445 койко уло. Тушто 310 еҥ эмлалтеш. Нунын кокла гыч 64 еҥже нелын черланышылан шотлалтеш, 152 еҥ кислород полыш дене пайдалана, ИВЛ-ыште 16 пациент улеш. Тичмаш республике мучко налмаште черланыше- влакын чотышт шагалемеш. Пытартыш кок арняште кече еда 19 гыч 23 марте черланышым рашемдат. Черланыше кокла гыч 38 процентше пенсионер, 25-ытше пашазе, 8 процент медицина пашаеҥ, шым процентше служащий улыт. Республикышкына 36 тӱжемат 892 дозо вакциным кондымо. Тымарте 25 тӱжемат 694 еҥ привикым ыштыктен. Тушечын 18 тӱжемат 255 еҥже тичмаш курсым эртен.