Кризис ваштареш виктаралтше мера- влак чоҥымо отрасльлан сайын вияҥаш йӧным ыштат

                Кризис ваштареш виктаралтше мера- влак вашталтше экономик условийыште чоҥымо отрасльлан сайын вияҥаш йӧным ыштат. Марий Элым вуйлатыше Александр Евстифеев Регионлам вияҥдыме шотышто Правительство комиссий президиумын председательжын алмаштышыже, чоҥымаш, илыме вер да коммунал озанлык министр Ирек Файзуллинын эртарыме совещанийыште участвоватлен. Совещаний чоҥымо отрасльлан тений ешартыш полышым пуымшо йодышлан пӧлеклалтын. Министр палемден: регион- влакын пашаштым шотыш налше антикризис мерын пакетшым ямдылыме. Йодыш- влакын кокымшо блокшо мланде, кадастр учёт да правам регистрироватлыме дене кылдалтын. Кумшо тӱшка йодыш: тошто пӧртла гыч калыкым кусарыме  регионласе программым шуктыдымо регион- влаклан мутым кучымо мерым пуртыде кодымо нерген. Нылымше йодыш: тений ЖКХ полышлан тӱлыдымылан штрафым шотлымо ойыртемым пеҥгыдемдымаш. Кызыт пени тӱҥ ставке дене кылдалтеш. Тудо кугу гын, пенижат кугу лиеш. Сандене кызыт тӧрлаш йӧн уло. Визымше блок йодыш объектым эксплуатацийыш налме жапым кугемдыме годым эскроу счёт дене опидышым кужемдымаш дене кылдалтын.
               Республикыште ямдылыме антикризис мер- влак илыме верым, социал объектлам чоҥымо темпым иземдаш огыт пу. Индивидуал программе кышкарыште Ураев бульварым умбакыже чоҥымо лиеш. Тидлан 100 миллион наре теҥге оксам палемдыме. Волжскышто азам ыштыме пӧлка умбакыже чоҥалтеш. Тудым тений октябрьлан шуктышаш улыт. Волжскысо Александровский вӱдзаборышто паша кая. Объектын акше- 383 миллион теҥге. Звениговышто очистной сооружений пужен ышталтеш. Тудын акше 410 миллион теҥгеш шуын. Республикысе корнылам олмыктымо шотышто кугыжаныш контрактым ыштыме, ола агломерацийыште 13 контарктым пеҥгыдемдыме, ик кӱварым чоҥаш гына ойпидышым пеҥгыдемден шуктымо огыл. Тений регионысо корнын 24 процентшым, ола агломерацийын 61 процентшым норматив марте шуктышаш улыт.
          Фото: Марий Элым вуйлатышын организаций да аналитик виктемже.