Козьмодемьянскыште пассажир причалым 2023-шо ийын ноябрьлан чоҥен шукташ сӧрат

               Козьмодемьянскыште пассажир причалым 2023-шо ийын ноябрьлан чоҥен шукташ сӧрат. Тудо Юл эҥер серыште Стрелецкий часамла воктене лийшаш. Эҥер судно- влаклан ошкыл лекман пассажир причалым чоҥаш проектым республикысе транспорт министерствын йодмыжо почеш «ЕСК» компаний группо ямдылен. Декабрьыште чоҥышо подрядчикым ойырен налме шотышто торг эртен. Конкурсышто «СтройКрафт» фирма сеҥен. Тудын дене ойпидышым кылдыме. Причалын тичмаш акше 230 миллион теҥгеш аклалтын. Оксам федерал бюджет ойыра. Пашам подрядчик 2022-шо ийыште тӱналеш да 2023-шо ийын ноябрьыште мучашлышаш улеш. Ушештарена: ола воктелсе кызытсе дебаркадер изирак судно- влакым гына вашлийын кертеш. Кугу, ныл палубан теплоход- влак Козьмодемьянск воктене чарнен огыт керт. У причалым ыштымаш тиде йодышым кораҥдышаш да турист- влаклан ола утларак почылтшаш.
                 Фото: Марийская правда.