«Калыкын чонжо» премийым тений кӧ налын?

            Республикыштына «Калыкын чонжо» правительство премийын лауреатше- влакым увертарыме. Тӱвыра министр Константин Иванов нунылан наградым Марий филармонийыште кучыктен. «Калык куштымаш» номинацийыште премийым Звенигово гыч «АРТ-Гранд» хореографий студийым вуйлатыше Анна Дёминалан кучыктымо. «Калык мурымашлан» премийым «Куан памаш» калык вокал эстрада студийын художественный вуйлатышыже Валерий Петров налын. «Кугезе кумыл» фольклор ансамбльым вуйлатыше Галина Щербакова «Курымла дене толшо калык тӱвыра» номинацийыште ойыртемалтын. «Калык инструментал сем» корно дене «Русь» калык хорым вуйлатыше Ильнар Гизатуллин палемдалтын. «Театр усталык» номинацийыште «Куткыеш» драмкружокым вуйлатыше Елена Юнусовалан премийым пуымо. «Кидпаша сымыкытыш дене калык мастар» номинацийыште «Унавий» кызытсе марий тӱр» калык студийын вуйлатышыже Эрик Бусыгин премийым налын.