Эн сай тоштер ден тоштер пашаеҥ- влакым палемдыме

                Республикыштына эн сай тоштер ден тоштер пашаеҥ- влакым палемденыт. Тӱвыра министр Константин Иванов «Республикын эн сай тоштерже да тоштер пашаеҥже- влак» конкурсышто сеҥыше- влалкан наградым кучыктен. Церемоний Яков Эшпай лӱмеш марий кугыжаныш филармонийыште эртен. «Тунемме тӧнежын эн сай тоштерже» номинацийыште Семёновка селасе 21-ше школын историй тоштерже, вуйлатышыже Оксана Васенина, Марий университетын зоологий тоштерже, вуйлатышыже Владимир Забиякин сеҥышыш лектыныт. «Эн сай частный тоштер» номинацийыште «Йошкин пырысын гастрономий тоштерже», вуйлатышыже Лариса Лисак, «Ведомствын эн сай тоштерже» номинацийыште Пӱртӱс поянлык министерствын Чодыра тоштерже, вуйлатышыже Тамара Ефимова, Правосудийын тоштерже, вуйлатышыже Анатолий Иваков ойыртемалтыныт. Тыгак шке номинацийыштышт Евсеев лӱмеш тоштер гыч Ольга Требушкова, Надежда Васканова, Александра Белоусова, Мария Бушила, Елена Кириллова, Олан Историй тоштерже гыч Мария Смирнова палемдалтыныт.