Балет артист да хореограф- влак таҥасат

              Йошкар-Олаште балетын артистше да хореограф- влакын Россий кӱкшытан конкурсышт лиеш. Эрик Сапаев лӱмеш Марий Кугыжаныш академический опера да балет театрыште тиде конкурс шуаш ийын 8-ше - 14-ше апрельыште лиеш. Конкурсын художественный вуйлатышыже- СССР-ын калык артистше, хореограф- влакын тӱнямбал ушемыштын президентше, Большой театрын балетмейстерже, профессор Юрий Григорович лиеш. Конкурс кажне ийын ныл  специальностьым вашталтылын эртаралтеш: «Характеран, калык  да сценылык куштымаш», «Классик куштымаш», «Хореограф-влак» да «Кызытсе куштымаш». Тений, мутлан, тудо Ярославльыште эртен. Тушко 25 олан представительышт ушненыт.