Александр Евстифеев илыме верым чоҥымашым Москошто каҥашен
Александр Евстифеев Республикыштына илыме верым чоҥымашым Москошто каҥашен. Теҥгече Марий Элым вуйлатыше паша дене элнан рӱдӧ олаштыже лийын. Тушто тудо регионлаште инфраструктурым вияҥдыме да илыме верым чоҥымаште палемдыме кӱкшытыш шумо йодышым каҥашыме семинар-совещанийыште участвоватлен. Погынышо- влаклан Россий Президент Администрацийым вуйлатышын икымше алмаштышыже Сергей Кириенко саламлыме шомакым ойлен. Чоҥымо паша- кушмашым ончыктышо тӱҥ отрасль. Сандене пандемий дене кылдалтше кризис деч вара экономикым писештарен колтыман. Улшо программе сай лектышыш тунам гына шуэш, кунам Россий правительство дене регион- влак чыла планым ик семын виктарен колтат,- каласен тудо. Правительство председательын алмаштышыже Марат Хуснуллин палемден: мероприятийыште тӱҥжо- элым вуйлатышын задачыжым шуктымаште эн пайдале корно- влакым каҥашымаш. Элыште кажне визымше метр у илыме верым чоҥымаш неле гынат, ыштен кертме паша. Марий Элым вуйлатыше чоҥымо пашалан кугу тӱткышым ойыра. Поснак социал, корно, транспорт инфраструктурым, корным чоҥымаш, тошто пӧртла гыч калыкым кусарымашлан. Неле эпидемиологий ситуацийым ончыде чоҥымо отрасль пандемий жапыштат ик кечыланат чарнен шогалын огыл. Корным, илыме верым чоҥымаш дене планым эртарен темыме, икмыняр ФАП-ым, йоча садым, школым да моло объектым эксплуатацийыш налме.