28 12 2018 Поро эр, Марий Эл [слушать]

26-шо декабрьыште кумдан палыме сылнымутмастар Вячеслав Абукаев-Эмгакын шочмо кечыже. Ила ыле гын, тений 60 ийым тема ыле. Вячеслав Александровичын творчествыже тӱрлын почылтын. Тудо чыла жанр денат пашам ыштен да тудын йӱкшӧ, йылмыже кеч прозышто, кеч поэзийыште, кеч драматургийыште виян, ойыртемалтше да тыгодымак лывырге лийын. Марий сылнымутнам пойдарымаште тудын надырже моткоч кугу. А мыняре муро шочын… Марий композитор-влакын семышт почеш тудо 200 утла мурылан мутым возен. Вячеслав Абукаев-Эмгакын шочмо кечынже, 26-шо декабрьыште, Йошкар-Олаште тудым шарныме погынымаш кас эртыш. Тушко сылнымутмастарым аклыше, пагалыше, шке жапыштыже полыш кидшым шуялтымыжлан таум ыштыше шуко еҥ, поэт-писатель йолташыже, мер пашаеҥ, журналист-шамыч погыненыт, Вячеслав Александровичым порын шарналтеныт. Тиде кастенак Вячеслав Абукаев Эмгак лӱмеш чумырымо поро кумылым ончыктышо «Ший памаш» фонд сылнымут конкурсым иктешлен. Чыла тидын нерген репортажыште колыштса.