27 06 2019 Поро эр, Марий Эл [слушать]

Йошкар-Олаште Шернур кундемын уста кид-мастарже Лидия Веткинан ончерже почылтын. «Кайыккомбо кашта» лӱман выставка тошто да кызытсе жаплан келшыше тӱрлеман марий вургемым, сӧрастарыме ӱзгарым, курчак-влакым чумырен. Нине экспонат-влак Республикысе арвер да сымыктыш тоштерым сӧрастареныт. Тушко мийыше кажне еҥ Лидия Васильевнан усталыкшым, мастарлыкшым аклен кертеш. А ончерым почмо кечын уста тӱрлызӧ шке пашажлан кок «визытан» отметкым нале. Вет тудо шкежат тиде кечылташте 55 ияш лӱмгечыжым палемдыш.