16 05 2019 Поро эр, Марий Эл [слушать]
Арня ончыч 9 майыште ме эн кугу да жаплыме пайремым - Кугу Ачамланде сарыште совет калыкын сеҥымыжлан 74 ий теммым палемдышна. Сеҥымаш кечын Йошкар-Олаште 25 тӱжем наре еҥ мондаш лийдыме, чонеш логалше «Курымашлык полкышко» ушнен. Республикыштына тиде акций кудымшо гана эртыш, ий еда участник-влакын чотышт кушкеш. Тиде гана гын, калык поснак шуко ыле. Игечат шокшо, мотор шогыш. Шукынжо тиде суапле сомылым шукташ лӱмынак ямдылалтыныт, пырля икшывыштым, уныкаштым конденыт. А кидыштышт кучымо фотосӱрет, портретла гоч нунын ӱмбак тыныс илышым пӧлеклыше коча-ковашт онченыт. Шке ешышт гыч герой-влак нерген мыланем «Курымашлык полкын» участникше-влак каласкаленыт.