04 07 2019 Поро эр, Марий Эл [слушать]
Пеледыш тылзын пытартыш кечынже – 30-шо июньышто-Марий Элын да Российын сулло врачше Зинаида Гордеевалан 65 ий теме. Тиде шкенжым пӱтынек йӧратыме пашажлан пӧлеклыше марий ӱдырамаш. Ончыклык профессийжым эше школышто тунеммыже годымак ойырен налын да, коктеланыде, вуйге медицина пашашке каен. Неле чер гоч эртыше шуко икшывылан да нунын ача-аваштлан Зинаида Семеновна аралыше суксышт дене иктак. Тудын кидыштыже шукыж годым йочан пӱрымашыже веле огыл, тудын илышыже. Уфа оласе медицина институтым тунем пытарымеке, тудо Йошкар-Оласе йоча эмлымверышке пашам ышташ толын да таче кече мартеат тушто тырша, кызыт тӱҥ врачын алмаштышыже. А 1988-ше ийыште Зинаида Гордеевалан Йошкар-Оласе йоча эмлымверыште онкогематологий отделенийым вуйлаташ ӱшаненыт.