«Марий Эл» ГТРК-ын шӧртньӧ фондшо гыч. «Кеҥеж йӱд» радиоспектакль

Республикынан Калык писательже Николай Арбанын ӱмыржӧ пӱтынек марий театр дене кылдалтын. Чапле сӱретче, данле семмастар, лывырге куштызо да – эн тӱҥжӧ - кугу мут юзо, тудо пел курым утла марий калыкын шӱмжым модыктен, шортарен, шодо кошкымешке воштылтен. «Кеҥеж йӱд» музыкальный комедийым Марий радион кугу студийыштыже 1960-шо ийыште возымо. Тӱҥ рольым палыме артист-влак Мария Сапожникова - Ольга, Виктор Бурлаков – Санюк, Георгий Пушкин – Марка кум, Владимир Зернов- Алгаев, Анастасия Страусова - Ведасий да молат модыт. Тыгеже тиде спектакль икымше  марий опереттылан шотлалтеш. Семым композитор Лев Сахаров келыштарен. Режиссержо – Россий искусствын сулло деятельже Сергей Иванов. Икманаш, спектакль сар деч вара ял илышым уэмдыме нерген. Тыште чылажат ончышылан лишыл да сымыстарыше - весела мыскаражат, музыкыжат, кумылло куштымашыжат. «Кеҥеж йӱд» музыкальный комедий Марий радион «шӧртньӧ» фондыштыжо аралалтеш. Колыштшо-влакын йодмышт почеш чӱчкыдынак эфирыште йоҥгалтеш да ончыкыжымат шергылташ тӱҥалеш…