«Марий Эл» ГТРК-ын шӧртньӧ фондшо гыч. «Илыше вӱд» радиоспектакль

«Илыше вӱд» драмым Марий радион кугу студийыштыже 1969 ийыште возымо. Тудын авторжо, кумдан палыме  писатель да поэт, марий литературын классикше, драматург да публицист Сергей Григорьевич Чавайн. Радиоспектакльын режиссёржо – РСФСР искусствын сулло деятельже Сергей Иванович Иванов. Тыште пеш палыме да пагалыме артист-влак: РСФСР-ын калык артистше Степан Кузьминых,  РСФСР-ын сулло артистше Иван Матвеев, РСФСР-ын сулло артистше Галина Иванова-Ямаева, РСФСР-ын сулло артистше Василий Регеж-Горохов, Марий АССР-ын калык артистше Мария Сапожникова, Марий АССР-ын калык артистше Владимир Янгабышев, артист Тамара Степанова модыт. Шке пьесыжым С.Г. Чавайн революций деч ончычсо ялыште илыше тыглай еҥ дене кутырмаш семын  чоҥен, пӱсӧ политический да социально-экономика темылан простан серен. Икманаш, «Илыше вӱд» радиоспектакль  марий калыкын койыш-шоктышыжым, тудын поян устный творчествыжым кумдан почын ончыкта.

 «Илыше вӱд» радиоспектакль Марий радион «шӧртньӧ шӧрлыкыштыжӧ» аралалтеш. Але марте тудо эфирыште ятыр гана йоҥгалтын, радиом колыштшо-влакын йодмышт почеш кызытат шергылтеш да кумылым нӧлта.



Загрузка плеера
ВКонтакт Одноклассники Facebook Twitter Livejournal Google Plus
Поделиться

Прошлые выпуски