Звениговышто калыклан социал полышым пуышо ойыртемалтше комплексым почмо

                    Звениговышто калыклан социал полышым пуышо ойыртемалтше комплексым почмо. Калыкым социально обслуживатлыше комплексный рӱдер дене социал полышым пуышо рӱдер уэмдыме кугу зданийыш кусненыт. Тачысе кечылан  технически пойдарыме, обслуживатлыме кызытсе йӧн, пуымо полыш- влак шотышто тыгай моло комплекс республикыштына уке. Кодшо ийын калыкым обслуживатлыме качествым кугемдаш Калыкле банкын пӧлкаже кок тӱжем квадрат метр кумдыкан кок пачашан административный зданийым пуэн ыле. Тудым олмыктымо, воктел кундемым тӱзландарыме, начар тазалыкан- влаклан подъемникым ыштыме. Ачалыме пашалан вич миллион утла теҥге оксам кучылтмо, эше кок миллион утла теҥгелан мебель ден оборудованийым налме. Теҥгече уэмдыме рӱдер- влакым почмашке Марий Элым вуйлатыше Александр Евстифеев миен. Кок рӱдерын ик верыште верланымыже калыклан пеш йӧнан. Документым возгалыме годым изи икшывым йоча пӧлемыште кодаш лиеш. Тушто логопед, психолог, социал реабилитаций специалист пашам ыштат. Республикым вуйлатыше сенсор комнатым, документым налме зоным, холлым ончен, у йӧн- влак дене палыме лийын. Тудо чыла тиде пашам шуктышо- влаклан таум каласен. Тиде зданийыштак Республикысе аварийно-утарыше службын Звениговысо группыжо верланен.