Йошкар- Ола ден Моском юж корно ушен
Моско ден Йошкар- Ола коклаште шукертсек вучымо южкапка почылтын. Таче йӱдым Йошкар- Олаш рӱдола гыч икымше самолёт чоҥештен толын. А эрдене лач 6 шагатат 15 минутлан Йошкар-Ола аэропорт гыч самолёт южыш чоҥештен кӱзен. Тиде кӱлешан событий дене республикысе калыкым Марий Элым вуйлатыше Александр Евстифеев саламлен. Тудо икымше рейсын пассажирже лийын. Евстифеев каласен: кызытсе илышыште авиакыл моткоч кӱлешан. Тудо пашаланат, туризмланат, канашат, эмлалташат, шинчымашым налашт кӱлеш. Александр Евстифеев ончыкылык нергенат ойлен. Кучемын планыштыже кечывалвел да йӱдвел могырышкылат юж корным почаш шонымаш уло. Тиде- Сочи, Крым да Санкт-Петербург. Калыкым уэш «Руслайн» авиакомпаний шупшыкташ тӱҥалын. Самолётын командирже Сергей Каскин Йошкар-Оласе чоҥештен кӱзымӧ да волен шичме полосам сайын олмыктымым палемден. Федераций Советыште Марий Элын представительже Константин Косачев ден Федераций Советын аппаратшым вуйлатыше Сергей Мартынов тыгак икымше рейс дене чоҥештеныт. Косачёв южкорным почашлан шуко пашам ыштыме нерген ойлен. Таче чылаже Москош 31 пассажир чоҥештен. Нуно Внуково аэропортыш сайын волен шинчыныт.