Юркинысе уэмдыме тӱвыра пӧртым торжественно почмо

Юрино районысо Юркино посёлкышто пужен ыштыме деч вара тӱвыра пӧртым почмо. Олмыктымо пашам «Тӱвыра» проект кышкарыште шуктымо. Тиде тӱвыра пӧрт кок тӱжем наре еҥан кум ялым обслуживатла. Пӧртшым 1990-шо ийыште чоҥымо. Вара капитально олмыктымаш лийын огыл. Леведыш вӱдым колтымылан кӧра, тудо аварийныйыш савырнен да 2002-шо ий гыч пашам ыштен огыл. Чыла мероприятийым школышто, книгагудышто да уремыште эртарыме. Идалык еда тысе коллектив 280 наре тӱшка мероприятийым эртара. Тушто йоча, самырык да ешлан кум клуб да кок кружок пашам ышта, мурышо ӱдырамаш ансамбль уло. Олмыктымо пашалан тӱрлӧ бюджет гыч 8 миллионат 500 тӱжем теҥгем ойырымо. Шуко оксаже леведышым ышташ каен. Оксам аныклен, эше ырыктыме системым, пӧртончылым, залым, фойем олмыктымо, окна ден омсам вашталтыме. Тыгак теплотрассым пыштыме. «Верысе тӱвыра пӧрт» программе почеш сем оборудованийым, сценылык вургемым да креслым налме. Тӱвыра пӧртым почмашке Республикым вуйлатышын администрацийже гыч, тӱвыра министерствын еҥже- влак миеныт. Олмыктымо пашаште чолган тыршыше- влаклан тауштымашан серышым кучыктымо, а верысе артист- влак у залыште чапле концертым ончыктеныт.