Вашке Йошкар-Ола гыч Санкт- Петербургышкат чоҥешташ лиеш

У ий гыч Йошкар-Ола гыч Москошко веле огыл, Санкт-Петербургышкат самолёт дене чоҥештылаш лиеш. Санкт-Петербург гыч Йошкар-Олаш авиарейс- влакым 2020-шо ийлан оксам ойырымо перечньыш пуртеныт. Тидын нерген Росавиацийын увержылан эҥертен, «Марий Элыште Авиаций» увертара. 50 веран самолёт- влак шушаш ийын январь гыч декабрь марте Санкт-Петербург гыч Йошкар-Олаш арняште кок гана чоҥештылаш тӱҥалшаш улыт. «РусЛайн» авиакомпаний чылаже 104 мужыр рейсым ыштышаш. Маршрут ик тӱжемат 85 меҥгыш погына. Юж транспорт федерал агентствын увертарымыж почеш роскотын 30 процентшым Республике шке ӱмбакыже налеш, 30 процентшым Санкт-Петербургын бюджетше ойыра. 2020-шо ийлан Россий правительствын пунчалже почеш регионласе рейс- влаклан полшаш федерал бюджет гыч 8 миллиардат 300 утла миллион теҥге ойыралтеш. Тидыже тенийсе деч 500 миллион теҥгелан шукырак.