Турцийын Озаҥ олаште Генеральный консулжо Марий Элыш толын каен
Теҥгече Марий Элым вуйлатыше Александр Евстифеев Турций Республикын Озаҥ олаште Генеральный консулжо Исмет Эрикан дене пашаче вашлиймашым эртарен. Тудыжо тиде пашаш тений октябрьыште шогалын. Александр Евстифеев дипломатым должностьыш шогалме дене саламлен да Турций дене вашкылын икмыняр корныжым палемден. Мый палем, те опытан дипломат улыда, ятыр элын экономикыжым паледа. Озаҥыште пашам ыштышыла, Юл кундемын географий да экономик йӧнжым шинчеда. Марий Эл дене вашкыл кызыт пеш чолган ок вияҥ. Экономике кыл нерген ойлаш гын, тиде Марбумкомбинатын продукцийже, пушеҥгым, изиш гына кочкыш сатум колтымаш, тӱрлӧ жапыште тӱрлӧ семын тӱвыра да туныктыш кылым ыштыме. Вашкылым ме кӱлешанлан шотлена. Кызыт Россий ден Турций коклаште вашкыл сайын вияҥеш. Российысе южо кундем моло элласе кундем- влак дене вашкылым кучымо примерат уло. Экономике, тӱвыра, туныктыш аланыште тыгай формат дене кыл Марий Эл ден Турцийысе ола але кундем дене ышталт кертеш, - палемден Евстифеев. Генеральный консул Исмет Эрикан Марий Элыште илыше тӱрлӧ калык коклаште поро кылым палемден да кок эл кокласе могай кыл лийын кертме нерген каласен. Эрдене муфтий, мусульман- влакын духовный виктемыштым вуйлатыше дене вашлийынам, мечетьыш миенна, манын. Ужмо пеш куандарен. Мусульман, руш да моло калык пеш келшен илат. Тиде куандара. Тидын шотышто шуктымо пашаланда тау манын тудо. Но кок эл кокласе кылым ыштымаште шуко паша вуча. Ужалкалыме паша начар, но тудо вияҥшаш. Моло аланыштат кылым ышташ ямде улына манын, консул. Юл кундемысе таможня виктемын ончыктымыж почеш, Марий Эл ден Турций коклаште внешне торговый оборот кодшо ийын кум миллионат 426 тӱжем долларыш шуын, тенийсе 9 тылзыште кок миллионат 800 тӱжем утла доллар лийын. Экспротыш утларакше пушеҥым да целлюлоз-кагаз сатум колтымо. А тушечын машиностроений продукцийым налме. Йодыш- влакым каҥашыме годым вашкыл утларак пеҥыде лиеш манын ӱшаным каласыме.