Теҥгече Марий Элым вуйлатыше Александр Евстифеев Россий президент пеленысе Президиум Советын заседанийыштыже лийын
Теҥгече Марий Элым вуйлатыше Александр Евстифеев Россий президент пеленысе стратегий вияҥмаш да калыкле проект шотышто Президиум Советын заседанийыштыже лийын. Тудым видеоконференций йӧн дене Российын премьер- министрже Дмитрий Медведев вӱден. Заседанийыш погынышо- влак «Тӱнямбал коопераций да экспорт», «Паша лектыш да паша верым муаш полшымаш», «Изи да кыдалаш предпринимательстве ден посна амалкалче инициативылан полшымаш» калыкле проект- влакым шыҥдарыме йодышым каҥашеныт. «Тӱнямбал коопераций да экспорт» проектым шыҥдарыме кышкарыште Марий Элыште Республикым вуйлатыше пелен Совет регионысо проектын ныл паспортшым пеҥгыдемден. Тиде- «Промышленный экспорт», «АПК продукцийым экспортыш колтымаш», «Тӱнямбал коопераций ден экспортым вияҥдыме системный мера» да «Услуга экспорт». «Паша лектыш да паша верым муаш полшымаш» проект нерген ойлаш гын, регионысо кум проектым пеҥгыдемдыме. Нуным 2024-ше ий марте шыҥдараш палемдыме. Российысе Минэкономразвитийын графикше почеш, республике проектыш 2021-ше ий гыч ушнышаш ыле. Но ончылгоч кӱлеш пашам ыштен колтымылан кӧра, регион шушаш ий гычак тӱҥалаш ямде. Пашашке вич предприятий ушна. Тыге сентябрьыште республикын экономически вияҥмаш министерствыж ден «Марий Эл Дорстрой», «Искож завод», «Йошкар-Оласе шылкомбинат», «Марий картонаж мануфактура» да «Чоҥаш» ушем- влак коклаште вашкыл шотышто соглашенийым ыштыме. Туныктымо мероприятийлашке ушнаш нине предприятий- влак 35 еҥым туныкташ йодмашым пуэныт. Пеҥгыдемдыме паспорт- влак дене келшышын, 24-ше ий марте тӱрлӧ вер гыч 306 миллион теҥге оксам кучылташ палемдыме. «Изи да кыдалаш предпринимательстве ден посна амалкалче инициативылан полшымаш» калыкле проект почеш регионысо вич проектым пеҥгыдемдыме. Нуным 6 ий жапыште шыҥдараш кок миллиард теҥгем кучылташ кӱлеш. Ушештарена: республикыште чылаже регионысо 53 проектым пеҥгыдемдыме. Нунын кокла гыч 22-шылан тенийлан оксам ойыраш лийме. Тений нуным шыҥдараш 7 миллиард утла теҥгем, вес ийлан 8 миллиард утла теҥгем палемдыме. Калыкле проект- влакым шыҥдарыме пашаште йоҥылышым ыштыше- влак уголовно мутым кучаш тӱналыт, манын шижтарен Дмитрий Медведев. Тудын мутшо почеш, кызыт планым шуктымо шотышто проблеме- влак шотлымо тӱрлӧ методике да статистикын шотлымыжо дене кылдалтыныт. Икымшыже тиде- паша лектышым шотлымаш, весыже- губернатор- влакын паша лектышыштым аклаш кучылтмо показатель- влак. Тыште методике- влакым тӧр кондыман. Сандене тудо Российысе экономически вияҥмаш министерствылан тыгай ойыртемым кораҥдаш темлен.