Шушаш ийын республикыштына эшеат шукырак корным олмыктышаш улыт
Марий Элна шушаш ийын корным олмыктымо кугу пашалан ямдылалтеш. «Лӱдыкшыдымӧ да сай качестван автомобиль корно- влак» калыкле проектын кокла лектышыжым Республикым вуйлатыше Александр Евстифеевын эртарыме совещанийыште ончымо. Каласыме: тенийлан 120 меҥге кужытан 38 корным олмыкташ палемдыме ыле. Тушечын 25-шым проект кышкарыште, молыжым республикысе корно фондын оксаже кӱшеш ыштышаш улыт. Кызыт чылы объектыштат паша кая але южо вере мучашлыме. 90 процент объектыште ӱмбал ужашым шарыме, эксплуатацийыш 38 меҥге корным налме. Тидыже 42 процент лиеш. Оксам ойырымо дене 54 процентыш шуын. Тиде сай показательлан шотлалтеш. Россий транспорт министрын икымше алмаштышыже Иннокентий Алафиновын эртарыме видеоконференцийыште палемдыме: ме ончыл регион- влак радамыште улына,- каласен Марий Эл правительстве председательын икымше алмаштышыже Александр Сальников. Республикым вуйлатыше ушештарен: тенийлан пашам шагалрак палемдыме ыле, тиде льготан идалык. Сандене пашам луштараш ок лий. Вараже кажне ийын паша лектыш 30-40 процентлан ешаралт толшаш. Тений олмыктымо корнын кугытшо кум пачаш утлалан кугемын: 36 гыч 120 меҥге марте. Шушаш ийланат ямдылалташ тӱҥалме. 2020-шо ийлан планыш пуртымо 34 объект гыч 17-шым торгышко лукмо, контрактым ышташ тӱҥалме. Нуно республике кӱкшытан корно улыт. Кодшо 17 объектше Йошкар-Ола агломерацийыш пурат. Декабрь марте проектно-сметный документаций ямде лийшаш. Тидыже февраль марте контрактым ышташ йӧным пуа. Каҥашыме эше ик йодыш Сеҥымаш бульвар дене кылдалтын. Тудым Кугу сеҥымашын лӱмгече идалыкыштыже олмыктен шуктыман. Александр Сальников тушко эше Чавайн бульварымат ушеш темлен. Мэр Евгений Масловын мутшо почеш, тушто кок меҥге наре корным олмыктымо лиеш. Ушештарена: кодшо арнян Марий Элым вуйлатыше рӱдӧ паркыште Мемориал ансамбльым тӧрлаш кӱштен ыле. Тыге, калыкын каналтен коштмо верже- влак эше сӧралрак лийшаш улыт.