Санкт-Петербургышто Марий Элыште ыштен лукмо сатум ужалыше кевыт почылтын

                   Санкт-Петербург олаште Марий Элыште ыштен лукмо сатум ужалыше кевыт почылтын. Республикысе ял озанлык министерствын ончыктымыж почеш, тыгай кевытым декабрьыштак почмо. Тушто «Марий Элыште ыштыме» бренд дене продуктым налаш лиеш. Тиде Шернур сырзаводын ушкал, каза, шорык шӧр гыч ыштыме сырже, Йошкар-Ола шыл комбинатын колбаса ден деликатесше, Йошкар-Ола хладокомбинатын кылмыктыме саскаже, емыжше, поҥгыжо, каза шӧр гыч мороженыйже. Министерствын ойлымыж почеш, Санкт-Петербургысо калык марий сатум куанен налеш. Ончыкыжым ассортиментым да ужалыме сетьым кумдаҥдаш шонат.