Россий Федерацийын Конституцийышкыже вашталтышым пуртымо шотышто йӱклымаш кая

Россий Федерацийын Конституцийышкыже вашталтышым пуртымо шотышто йӱклымаш республикыштына кузерак кая? Теҥгече Марий Элысе ЦИК-ын еҥже Ирина Смышляева журналист- влаклан умылтарымашым пуэн. Участковый комиссий- влак йӱклымашым заллаште эртарат, тора яллашке лектын коштыт. Чылаже 241 участковый комиссий 901 тора ялыш мияш палемден. Тидын годым кушко да кунам мийышашым ончылгоч шижтарат. Йӱклаш шонышо еҥ иктаж-могай амал дене йӱклаш миен огеш керт гын, участковый комиссийын еҥже- влак тудын мӧҥгышкыжӧ толыт. 27-ше июньлан шотлымаште мӧҥгышкӧ мияш 32 тӱжем утла йодмаш пурен. Республикыште тыгак пӧрт воктелсе кундемлаште келышарыме верлаште йӱклымашым эртараш тӱналме. Тыгай 26 верым палемдыме. Мутлан, Полупроводник прибор-влак заводышто тыршыше- влак заводыштак йӱклен кертыт. Рӱдӧ сайлыме комиссий йӱклышӧ- влак шотышто уверым иктешлен шога. 27-ше июнь марте 134 тӱжем утла еҥ шке йӱкшым пуэн. Тидыже 25 процент лиеш. Эн шуко еҥ Юрино да Шернур районлаште йӱклен. Йошкар-Олаште 15 процент еҥ чолгалыкым ончыктен. Республикысе ЦИК-ыште шокшо телефон линий пашам ышта. Номерже: 240-220.